Beyin cərrahiyyəsi əməliyyatı

Baş ağrısı və başgicəllənmə şikayətləri ilə bizə müraciət edən pasiyentin MRT müayinəsi zamanı tentorium cerebelli ilə əlaqəli, həm supratentorial, həm də subtentorial sahələri əhatə edən iri ölçülü törəmə aşkarlandı.

Ətraflı tibbi planlama və dəqiq diaqnoz nəticəsində cərrahi əməliyyatla törəmə tam (total) şəkildə xaric edildi. Ən sevindirici məqam isə – pasiyentimiz əməliyyatdan sonra heç bir nevroloji defisit olmadan, gülərüz və sağlam halda evə yazıldı. Əməliyyatın uğurla icra olunmasında əməyi olan bütün komandaya təşəkkür edirəm.

Beyin cərrahiyyəsi

Mərkəzi sinir sistemi (beyin və onurğa beyni), kəllə, sinirlər və damar strukturları ilə bağlı problemlərin diaqnostikası və müalicəsini əhatə edən cərrahi sahədir. Bu əməliyyatlar həyat qurtaran və ya həyat keyfiyyətini ciddi şəkildə yaxşılaşdıran tibbi müdaxilələrdir.

Hansı hallarda beyin cərrahiyyəsi tələb olunur?

Aşağıdakı tibbi vəziyyətlər beyin cərrahiyyəsini zəruri edə bilər:

• Beyin şişləri (xarici və daxili mənşəli)

• Beyin anevrizmaları (damar genişlənmələri)

• Qanaxmalar (subaraknoid və ya epidural hematomlar)

• Epilepsiya əməliyyatları

• Kəllə travmaları

• Hidrosefaliya (beyin boşluqlarında maye yığılması)

• Meningioma, glioma, astrositoma və digər törəmələr

• Nevroloji defisitlərə səbəb olan basqı törəmələri

• Parkinson xəstəliyinə aid stimulyator yerləşdirmə əməliyyatları

Beyin əməliyyatı öncəsi müayinələr

Effektiv və təhlükəsiz beyin cərrahiyyəsi üçün düzgün diaqnoz əsas şərtdir. Adətən aşağıdakı müayinə metodlarından istifadə olunur:

• Maqnit Rezonans Tomoqrafiyası (MRT)

• Kompyuter Tomoqrafiyası (KT)

• Angiografiya (damar müayinəsi)

• EEQ (beyin fəaliyyətinin elektrik diaqnozu)

• Nevroloji müayinə və psixoloji testlər

Beyin cərrahiyyəsində müasir yanaşmalar

Müasir beyin cərrahiyyəsi mikrocərrahiyyə texnikaları, naviqasiya sistemləri, nevro-monitorinq, və endoskopik üsullarla aparılır. Əməliyyat zamanı beyin toxumasına minimal zərər vermək və funksional sahələri qorumaq prioritetdir.

Əməliyyatın gedişi aşağıdakı mərhələləri əhatə edir:

1. Planlama – MRT nəticələri əsasında 3D planlamalar

2. Anesteziya – ümumi və ya lokal anesteziya

3. Kəllə sümüklərinin açılması (kraniotomiya)

4. Törəmənin və ya patologiyanın çıxarılması

5. Tikiş və reabilitasiya mərhələsinə keçid

Beyin əməliyyatından sonra

Bu zaman sadəcə sağ qalmaq deyil, keyfiyyətli yaşamaq da vacibdir. Əməliyyat uğurla başa çatsa belə, sonrakı dövr diqqətlə izlənməlidir. Beyin əməliyyatından sonra sağlam və balanslı həyata dönüş üçün aşağıdakılar vacib rol oynayır. Əməliyyat sonrası hər hansı bir gecikmiş fəsadın və ya yenidən yaranma riskinin qarşısını almaq üçün nevroloji nəzarət vacibdir. Ən azı 6 ayda bir yoxlanış məsləhətdir. Əməliyyat zamanı sinir toxumalarına təsir olmuşsa, bərpa prosesi üçün fiziki məşqlər, masajlar və fizioterapiya prosedurları önəmlidir. Bu, motor funksiyaların və koordinasiyanın bərpasını sürətləndirir. Beyin əməliyyatı keçirən pasiyentlərdə bəzən qorxu, təşviş və emosional gərginlik yarana bilər. Psixoloq dəstəyi, həyat keyfiyyətinin psixi tərəfdən qorunmasına yardım edir.

Beyin fəaliyyətinin tam bərpası üçün vitamin və mikroelementlərlə zəngin qida rejimi və kifayət qədər yuxu şərtdir. Alkoqol, siqaret və stressdən uzaq durmaq bu mərhələdə xüsusilə önəmlidir. Beyin əməliyyatı – sadəcə tibbi bir müdaxilə deyil, pasiyentin həyatına yeni bir başlanğıcdır. Təcrübəli həkimlər, texnoloji imkanlar və pasiyentin öz səbirli yanaşması bir araya gəldikdə, bu çətin yol uğurla başa çatır.

Vaxtında qoyulmuş düzgün diaqnoz, peşəkar tibbi müdaxilə və sistemli nəzarət – həyatınızı xilas edə bilər.

Sizin sağlamlığınız mənim naliyyətimdir!

Neyrocərrah Bəhruz Eyvazov